Mat 22 | KYG | STEP | Halate Yesu'a aeno kalafefa gemo huno hapa paino'ae'mo, Goti'a yagaino ne'apateya kava'mo hane'niya kava huno mago ala ne'apimo kini ne'mo'a mafa'ne'amo a'mo aligefe hu'nigeno'ae'mo mafa'ne'amo lusi ne'ya'mo kaeno ate'niye.

Matthew 22

Yesu'a a'mo lagaugefe'mo lusi ne'ya'mo kae'naya kavafe'mo aeno kalafefa gemo hu'niya gemae

(Luk 14:16-24)

1 Halate Yesu'a aeno kalafefa gemo huno hapa paino'ae'mo, Goti'a yagaino ne'apateya kava'mo hane'niya kava huno mago ala ne'apimo kini ne'mo'a mafa'ne'amo a'mo aligefe hu'nigeno'ae'mo mafa'ne'amo lusi ne'ya'mo kaeno ate'niye. 3 Agaemo ali'ya'amo ne'aliya vaya'mo alino apate'nige'a u'a eyo huno ge hu'niya vaya'aife'mo hapa pai'apae'mo, yahauve ne'mo'a ago ne'ya'mo kae'niyanagi eyo, huno hu'niye, hu'a hapa pai'naya'monanafa o'afi'nae. 4 Agaemo mago'e huno ali'ya'amo ne'aliya vaya'aife'mo, eyo hu'na ge hu'nova vaya'aife'mo utapa hapa paitapae'mo, ne'ya'mo ago yagita huno male'niye. Alopa pulumaka'e aikeli pulumaka'e'mo heno kae male'niyanagi a'mo alisiya ne'yategamo eyo, hutapa hapa paiyo, huno hapa paiteno alino apate'nige'a u'a hapa pai'nae. 5 U'a hapa pai'naya'monanafa ge'apimo o'afi'a atagu fae'a u e'a hu'nae. Mago vekamo hoya'alega u'nigeno mago vekamo ali'ya'alega u'niye. 6 Mago vaya'amogi ala ne'mo ali'ya'amo ne'aliya vaya'mo apatafau'a hu'a faipa hu'a apatete'a kamiti apamagi'nae. 7 Ala ne'apimo kini vekamo'a lusi kava huno aipamo le'nigeno ati vaya'amo alino apate'nige'a u'a vaya'amo hapae'naya vaya'mo hapae'a hano hu'a apatalete'a taoni'apimo ata kae'a atale'nae. 8 Agaemo ali'ya'amo ne'aliya vaya'aife'mo hapa paino'ae'mo, mafa'ne'nimo'mo a'mo aligefe hu'nige'na yagita hu'nova'monanafa eyo hu'na ge hu'nova vaya'mo alisaya vaya'mo alagi o'mai'naya'mofe'mo alagi e'a o'negae. 9 Alopa kate'mo ne'utapa muki apakesaya vaya'aife'mo hapa paitapae'mo, ne'ya'mo nekaeyategamo eyo, hutapa hapa paiyo, huno hapa pai'niye. 10 Ani kava hu'a ali'ya'amo ne'aliya vaya'mogimo u'a hosu vaya'e alagepa vaya'e'mo apavaleli e'a apate'nage'a no'afi'mo mai'a kili pae'nae. 11 Ala ne'apimo kini vekamo'a ne'yate'mo hai'a mai'naya vaya'mo apakesiyafe'mo haino ageyana a'mo ne'aliya afina'mo ne'vaiya agufa kukenamo alino o'vai'niya vekamo haino mai'nigeno ageteno'ae'mo, 12 Ve'nimo, huno, haiya kava higeka a'mo ne'aliya afina'mo ali'a ne'vaiya kukenamo alika o'vaika haikeka mai'nane, huno afi ge'nigeno ge'amo ohane'niye. 13 Ala ne'apimo kini vekamo'a ali'ya'amo ne'aliya vaya'aife'mo hapa paino'ae'mo, aiya ayate'mo nofi kitetapa alinitutapa malaga hani kopi'mo yaga autapa ataleyo. Ani kote'mo maisaya vaya'mogimo avi'ya huge apavepi'mo hanige hu'a maigae, huno hu'niye, huno hapa paiteno'ae'mo, 14 Goti'a asole vaya'aife'mo eyo huno ge hu'niya'monanafa aise vaya'mo lekana paino apate'niye, huno hapa pai'niye.

Takesi monimo ne'malaya kavafe'mo ava gemo hu'niya gemae

(Mak 12:13-17; Luk 20:20-26)

15 Falasi mono vaya'mo u'a ali'a anupa hu'a mai'ne'apae'mo, na agufa geleti'mo amalageka hisunageno ge nehisigeta atafausune, hu'a hute'a ge huge afige hu'a mai'nae. 16 Apakaemo ge'apimo ne'afiya vaya'e Heloti ge'amo akame nehaya vaya'e'mo ali'a apate'nage'a agaetegamo u'apae'mo, Tisao, hu'a, ago kage'nonana alagi lama ge'age'mo nehana vekamo mai'neka Goti ge'amo akame hisaya kavafe'mo lama geleti'mo alika apaya ne'malane. Muki vaya'aife'mo koli osuka muki vaya'aitegamo magoke agufa kava'age'mo nehana vekamo mai'nane. 17 Mai'nana'mofe'mo yagaino nelateya gamani vekamo Sisa'mo takesi monimo alita amisupi o'amisune. Kagaemo na agufa ge, huka kagesamo ne'afine, hu'a afi ge'nae.

18 Yesu'a hosu apaipa apakesa afi'naya kava'apimo ago apaketeno'ae'mo, aetapa ati nekaya vaya'mogitapae, huno, na kava higetapae'mo ane'ai hanagitapa natafaugefe'mo nehae. 19 Takesi nehaya monimo alitapa nave liyo, huno hapa pai'nige'a mago alaga monimo ali'a ave li'nae. 20 Agaemo loka huno apafi ge'niye. Mani alaga monile'mo ina la augosa'e agi'e'mo avo'mo kae male'naya agi'e augosa'e'mo hane'niye, huno apafi ge'nige'apae'mo Sisa augosa'e agi'e'mo hane'niye, hu'a ha pai'nageno Yesu'a, he, huno, hane'niya'mofe'mo Sisa ya'amo Sisa'mo amitetapa Goti ya'amo Goti'mo amiyo, huno hapa pai'niye. 22 Ani gemo afite'apae'mo hapau aite'a atale'a u'nae.

Fali'naya vaya'mo he tisaya kavafe'mo ge hu'a afi ge'naya gemae

(Mak 12:18-27; Luk 20:27-40)

23 Ani afina'mo mago Satiyusi mono vaya'mo Yesutegamo e'nae. Apakaemo fali'naya vaya'aife'mo he otigae, hu'a apakesa ne'afiya vayane. 24 Apakaemo, Tisao, hu'a, Mosese'a alino apaya maleno'ae'mo, mago vekamo'mo a aliteno mafa'nemo alino o'ateno ago falitesigeno'ae'mo agana'amo'mo kogu'amo aliteno fali'niya vekamo aimu'yale'mo mafa'nemo alino apateno, huno hapa pai'niye. 25 Mago afina'mo seveni'a konaga anaga'mo mai'nae. Nepu'apimo'a a'mo aliteno mafa'nemo alino o'ateno falitegeno'ae'mo agana'amo'mo kogu'amo ali'niye. 26 Agana'amo'e'mo ani kava huno falitegeno agae akamelegati agana'amogi'e'mo ani kava hu'a falime falime u'a seveni'a konagamo alagi fali'a hano hu'nae. 27 Falitageno'ae'mo henaga'amo a kanomo fali'niye. Seveni'a konagamogi ali'naya'mofe'mo fali'nayateti'mo he tisaya afina'mo haiya vekamo a'mo maigiye, hu'a afi ge'nae. 29 Yesu'a hapa paino'ae'mo, lapakaemo Goti Mukufi gemo o'afige Goti lokiya'amo o'agege hu'naya'mofe'mo ika ika lapakesa ne'afiye. 30 Fali'naya vaya'mo he ti'apae'mo a'mo o'alige vele'mo o'maige hugaya'monanafa koku'napi enisole vayakana hu'a maigae. 31 Fali'naya vaya'mo he tisaya kavafe'mo Goti'a lapa pai'niya gemo muku'afi'mo hane'niyana lekana paitapa o'afi'nafiye. 32 Goti'a,Emalehamu Goti'amo'namo maige Aisiki Goti'amo'namo maige Yekopu Goti'amo'namo maige hu'na mai'nove, huno hu'niye. Agaemo fali'naya vaya'ai Goti'apimo'mo o'mai'nifa afa'a ne'maiya vaya'ai Goti'apimo'mo mai'niye, huno hapa pai'niye. 33 Muki vaya'mogi ani gemo afite'apae'mo alino apaya male'niya ge'ae'mo hapau ai'nae.

Hogote ke'aepa ge'ae'mo hu'niya gemae

(Mak 12:28-31; Luk 10:25-28)

34 Mago Falasi vaya'mo Yu monote ne'yagaiya vaya'mo Yesutegamo e'a ali'a anupa hu'a mai'nae. 35 Mai'ne'apae'mo apakaepati'mo mago vekamo'a ke'aepa gemo alagepa huno afi'neno alino apaya ne'maleya vekamo'mo amalageka huno afi gesiyafe'mo huno'ae'mo, 36 Tisao, huno, muki ke'aepa gefati'mo hogote ke'aepa gemo aeno aga se'niya ke'aepa gemo haiya gemo hane'niye, huno afi ge'niye. 37 Yesu'a,Ala kava ne'mo Gotikamofe'mo muki kaipafatinagi muki kaunekamepatinagi muki kagesa afi yakafatinagi huno kahaino. 38 Mani ke'aepa gemo hogote gemo hane'neno muki ke'aepa ge'amo ago aeno aga se'niye. 39 Napa tu ke'aepa ge'e napa vani ke'aepa ge'e'mo magoke agufa gela'mo hane'niye. Napa tu ke'aepa gemo'mo huno'ae'mo,kagaikae'mo kahau kayamopafi'mo nekahaiya kava huka kahaopale ne'maiya vaya'aife'mo kahau kayamopafi'mo kahaino. 40 Mani lole ke'aepa gela'mo'a muki ke'aepa ge'amogi Gotitegati gemo alini e'a ae'a hakalo hu'a hapa nepaiya vaya'ai gemo'mogi huno aepa'ala'mo hane'na'ae, huno ha pai'niye.

Kalaisi ne'mo ina la mafa'ne'amo mai'niye, huno apafi ge'niya gemae

(Mak 12:35-37; Luk 20:41-44)

41 Yesu'a ali'a anupa hu'a mai'naya Falasi mono vaya'aife'mo apafi ge'niye. 42 Kalaisi nefe'mo haiya agufa lapakesa ne'afiye, huno huteno, ina la mafa'ne'amo mai'niye, hutapa lapakesa ne'afiye, huno apafi ge'nige'apae'mo, 43 Nevini mafa'nelupati'mo aginago ne'amo mai'niye, hu'a hu'nageno'ae'mo, Nevini aginago'amo mai'nisi'mo'mo haiya kava higeno Nevini'a Goti Auneme'amo'a alino ami'niya ge'aleti'mo Kalaisi nefe'mo huno'ae'mo, kava ne'nie, huno hu'niye. 44 Nevini'a ani gee'mo huno'ae'mo,

Ala kava ne'mo'a Ala kava ne'nie'mo huno'ae'mo, lamaga nahaopale'mo faika maime maime ne'uge'nao kamekamo apamagisuge'a kaiya afe'alumelaga maigayanagi, huno hu'niye.
45 Nevini'a Kalaisi nefe'mo kava ne'nie, huno hu'niya'mofe'mo haiya kava huno ma mopafi aginago ne'amo mai'niye, huno apafi ge'nige'a 46 ge'ale'mo ae'a atagaina hu'a ha paisaya agufa ge'apimo alagi ohane'niye. Ani afinateti'mo koli hu'naya'mofe'mo mago'e hu'a loka hu'a afi oke'nae.